19.04.2026
ze źěłaŕnicki "Rěc a kultura" (8.4. w Drjowku)
Źěłaŕnicka k idejam kak lěpjej zwězaś kulturu z rěcu
Drebkau/Drjowk. W ramiku projekta SROKA za wuwijanje dolnoserbsku rěcnu strategiju se pśepšosyjo na zjawne źěłaŕnicki jadnotliwym temam. Dnja 8. apryla jo se prědne zarědowanje zwenka Chóśebuza organizěrowała. 20 wósobow su se zmakali w fryšnje renowěrowanim kawalěrskem domje pla Drjowkojskego groda. Město Drjowk jo z tym, až jo rum zadermo k dispoziciji stajiło, teke zasej raz aktiwnje pódpěrowała procowanja za zmócnjenje serbskeje rěcy. W ramiku 3-goźinskego zarědowanja su wobźělnice a wobźělniki nejpjerwjej zgromaźili, lěc abo kak serbska rěc a kultura stej hyšći resp. zasej zwězanej. W srokowej metafrje myslone jo głowne pšašanje, kak móžomy ze slobranego žywego woplěwanja serbskeje kultury zasej złoty standard serbskorěcneje kultury natwariś. K tomu su pótom w kupkoma dalej diskutěrowali a zběrali ideje a naraźenja. Wjelgin gódne jo było, až su se teke wobźělili wuknjece rěcy, kótarež maju wósebne pótrjeby, aby se wěrili jich fryšne rěcne znaśa teke w ramiku kulturnych zarědowanjow wuproběrowaś, nałožowaś a z tym teke zmócnili rěcne sebjewědobnje. Na jadnem boku su zběrali dla togo ideje, kak móžoš na zarědowanjach lěpjej signalizěrowaś z kim móžoš kak serbowaś abo natwariś serbskej rěcy wótwórjonu atmosferu. Naraźenja su na pśikład byli serbske stany, blida abo ławki na wjelikich zarědowanjach ako Kokot abo indiwiduelne “rěcne kmótšy” z kótarymiž móžoš se raz zgromadu rěcnje wuproběrowaś. Zgromadu na serbski colu, piwo abo jěšnicu skazaś jo zawěsće lažčej ako to sam wuproběrowaś a z cesto źiwnymi reakcijami pótom wobchadaś móc. Na drugem boku su teke diskutěrowali pódpěrowańske napšawy na pśikład za towaristwa, kótarež organizěruju zarědowanja a by rad kśěli wěcej serbskeje rěcy integrěrowaś ale njamógu to sami gótowaś. Teke jo se jasnje groniło, až muse byś “zamknjone” serbskorěcne zarědowanja. Wšo wótwóriś nimskorěcnym a z tym znicyś tak a tak jano rědko wobstojece rěcne rumy njejo žedna opcija. Za to su pśibytne měnili, by derje było se do togo pśemysliś kak kśě z rěcu na konkretnych zarědowanjach wobchadaś a to pón teke do togo abo na zachopjeńku komunicěrowaś. Ako pśikłady su pokazali na serbske blido měsćańskego serbskego muzeuma, serbske namšy, kupku serbskego rucnego źěła, serbsku tejowu pśestawku w Oblomow abo Zorja-kafejownu. Zběrane wuslědki něnto projektowy team SROKA wót Serbskego instituta w měsće sortěrujo a wobźěła. Pótom budu wózjawjone na projektowem internetowem boku. Cil jo, až strategiska kupka móžo je zapśěgnuś gaž formulěrujo cile a napšawy za rěcnu strategiju. Dalšne ideje mógu wšykne teke w ramiku běźecego online-dialoga dodaś.