18.06.2026
z 2. pósejźenja pśirady projekta SROKA
W rumnosćach wótźělenja za regionalne wuwiśe a mjeńšyowy šćit Serbskego instituta w Chóśebuzu su se dnja 18. 6. 26 zmakali cłonki pśirady a projektowego teama SROKA na 2. póseźenje. W pśiraźe su zastopjone gremije, institucije a zastojnstwa ako Domowina, serbska rada, Załožba za serbki lud, Dolnoserbska rěcna komisija, krajna konferenca zagronitych za serbske nastupnosći a ministaŕstwje za kubłanje a za kulturu. Nadawk pśirady jo zwězaś aktiwity projekta SROKA za wuźěłanje dolnoserbskeje rěcneje strategije ze źěłom institucijow a gremiumow, kótarež maju teke nadawki a zagronitości na rěcnem pólu. Temy pósejźenja su byli aktualny staw projekta a mjazywuslědki strategiskeje kupki na droze k rěcnej strategiji.
Dalej su se dojadnali kak kśě do pśiducych kšacow zapśěgnjone byś. Mimo regularnych zmakanjow kśě se informěrowaś daś wó dalšne rozsudy a wuwijanja pśez elektronisku komunikaciju. Pón mógu se w jich strukturach wótgłosowaś a strategiskej kupce komentary a naraźenja sobu daś. Teke tak pomjenowany online-dialog strategiskeje kupki buźo teke pśistupnje cłonkam pśirady. Z tym mógu direktnje reagěrowaś na ideje teje kupki. Cel jo, až na kóńcu 2027 pśedlažy dokument rěcneje strategije. Diskutěrowali su teke perspektiwy dolnoserbskeje rěcy, kótarež wšykne se wobźělujuce ako principjelnje pozitiwnje gódnośiju. Wósebnje w prědnej fazy rěcneje wóžywjenja ma se teke glědaś na rolu jadnotliwych multiplikatorow a mjenjej na cełkowne institucije.
Krotki su teke wó to powědali lěc by dejali wótgłosowaś wšakorake koncepcije a strategije na pśikład wót Załožby, Domowinskeje župy, DomPro, MBJS a MWFK z rěcneju strategiju, což celowe kupki nastupa. Mjazystaw jo, až njejo notnje to formalnje rozrědowaś ale aby wažne było, wěźeś na co se rowno źěła, až se njewuźěła kontrarne koncepcije. Pśiduce zmakanje na městnje jo planowane za kóńc lěta, gaž pśiduce źěłaŕnicki, kšace online-dialoga a zmakanja strategiskeje kupki budu mimo. Wuslědkowy protokol se wózjawjijo pón hyšći na projektowem internetowem boku pód "downloady".