10.07.2025
Prědne zmakanje strategiskeje kupki / Erstes Treffen der Strategiegruppe
Für Übersetzungen bitte z.B. sotra.app nutzen.
Dnja 9. julija su se cłonki strategiskeje kupki prědny raz w rumnosćach Serbskego instituta w Chóśebuzu zmakali. Strategiska kupka wobstoj z 18 cesnoamtski statkujucych wósobow: Eric Bivour (Bórkowy), Koen Bruning (Chóśebuz), Saskia Bugajowa (Łuchow), Alina Bzdak (Gołbin), Rebecca Haertel (Barlin), Maksimilian Hasacki (Dešno), Birgit Kaufhold (Grodk), Reik Kneisel (Šleswig), Hajko Kozel (Drjenow), Šarlota Kušcyc (Dešno), Sabina Lehmannowa (Wózwjerch), Torsten Mak (Chóśebuz), Madlena Norberg (Chóśebuz), Anja Nowotnick (Grodk), Sabina Siegowa (Chóśebuz), Rainer Vogel (Zły Komorow), Lisa Wimmer (Lubnjow) a Jeannine Zinke-Sachs (Nowa Wjas).
Nadawk toś teje kupki buźo pśewóźowanje wuźěłanja rěcnego plana za dolnoserbsku rěc až do kóńca lěta 2027. Wóna dej wšykne zakładne rozsudy stwóriś glědajucy na wuwijanje rěcnego plana. Cel jo zmócnjenje a wóžywjenje dolnoserbskeje rěcy.
Lěcrownož deje pósejźenja kupki principielnje zjawne byś, jo prědne zmakanje hyšći jano mjazsobu było. Tak su se mógli cłonki nejpjerwjej w měrje zeznaś a wuměnjaś k zakładam zgromadnego źěła. Su teke wobzamknuli wustawki strategiskeje kupki a pśirady. Planowane jo zmakanje strategiskeje kupki někak kuždy kwartal. K tomu pśidu pón hyšći zjawne źěłaŕnicki a online-dialogi k wšakorakim temam z wóznamom za serbske zgromaźeństwo. Na pśiducem pósejźenju jo planowane, powědaŕku abo powědarja kupki wozwóliś.