28.01.2026
Nachlese: Gesprächsbereit
K powědanju zwólny: SROKA w dialogu
W ramiku dialognego formata “Gesprächsbereit” jo bergaŕski region Łužyca organizěrował wjacor z titelom “Serbsku rěc nowo nadejś”. W srjejźišću jo stojało pśedstajenje projekta SROKA za wóžywjenje serbskeje rěcy w Dolnej Łužycy. Saskia Bugajowa ako powědaŕka cesnoamtskeje strategiskeje kupki za wuźěłanje rěcneje strategije a Sophie Rädelowa wót projektowego teama SROKA na Serbskem instituśe w měsće stej wótegroniłej na pšašanja moderatorki a publikuma. Wósebnje jo se na to pokazało, kak stej se ze serbskeju rěcu zwězali, lěcrownož njejstej direktnje z njeju wótrosłej. Z Rogowa pla Baršća póchadujuca a něnto w Łuchowje bydleca Saskia Bugajowa jo na typisku situaciju pokazała, až w swajźbje njejo wěcej tak prezentnje, až prastaŕka a starka stej hyšći serbowałej, ale až se serbsku rěc zasej pśiswójiś jo móžnosć zwiski ku kŕojenjam a zgubjonej domownje natwariś. Hynac wokoło jo za z Grabina póchadujucu a do bliskosći Drjowka śěgnjonu Sophie Rädelowu serbšćina móžnosć se z noweju domownju zwězaś. Z někak 30 luźimi jo mała rumnosć połna była. Wětšyna luźi su zajmowane a angažěrowane Serbowki a Serby byli. Jo to małe pśechwatanje było, dokulaž su organizatorki a projektowy team se myslili, aby z tym “njeserbskim” formatom teke dojśpiś njeserbski publikum aby mógli z nimi wó serbsku rěc w našom regionje powědaś. Weto jo było dobry wjacor. W publikumje su teke luźe byli, kótarež až doněnta njejsu intensiwny kontakt k Serbam abo serbskej rěcy měli ale pśemysliju rěc wuknuś, ze pla projekta Zorja procowaś abo serbske kórjenje zasej wóžywiś. Pśibytne su teke na to poazali, až njemuse wšykne we Łužycy ned se w serbskich towaristwach angažěrowaś abo serbsku rěc wuknuś. Ale trěbne jo teke pózitiwnje nastajony wobswět. Gaž teke njeserbske luźe rozměju abo maju za derje, až serbska rěc a kultura stej dalej žywej w regionje a pódpěruju tych, kótarež kśě to woplěwaś abo wóžywiś, jo to juž wjelika pomoc za zgromadnosć we Łužycy. Pó dialognem rozgronje jo był pśigótowany wótwórjony źěł wjacora. Źeń pó ptaškowej swajźbje ja dało pjacone sroki a druge słodkosći a pśi tom wjele dalšnych rozgronow w mjeńšych rundach. Projektowy team jo teke pśigótował frankěrowane postowe kórtki a dwójorěcne póstrowjeńske tekstowe kamuški w formje małych nalipkow. Tak su wšykne móžnosć měli dwójorěcne kórtki swójim familijam a pśijaśelam pósłaś. Toś tu ideju su pśibytne za wjelgin dobru měli. A tak jo na kóńcu togo wjacora naša serbska rěc do swěta zaleśeła.